Giro polita Euskararen eguneko Mintzodromoan

Atzo, Euskararen egunean, Mintzodromoa egin zen udaletxe azpiko herri aretoan, zaldibitarrak euskararen egoeraren inguruan gogoeta egitera animatzeko. Hogei lagun inguru bildu ziren saioan, eta talde txikitan banatuta, euskararen orainaz, iraganaz eta etorkizunaz hausnartu zuten.

Ikuspuntu desberdinak partekatzeko balio izan zuen atzo arratsaldeko Mintzodromoak, eta bertaratu zirenek "oso ondo" baloratu zuten ekimena, "errepikatzeko modukoa" dela nabarmenduz. Mintzodromoan parte hartu zuten herriko hainbat euskaltzalek, Zaldibiko zenbait eragiletako ordezkariek, euskara taldeko kideek eta herrian sortu berri den mintzapraktika taldeko lagunek. Izan ere, Etxekonekok elkarteak sustatuta, astean behin euskaraz hitz egiteko biltzen da herritar talde bat, eta Euskararen eguna baliatu zen taldea aurkeztu eta eurekin batera solasaldia egiteko. Mintza-praktika taldearen helburua da, euskara ikasi duten euskaldun-berriek lasai eta lagun artean hitz egiteko bilgune bat izatea, eta hori osatzeko lehen urratsak egin dituzte Zaldibian. Ostegun arratsaldetan biltzen da taldea, eta parte hartu nahi duen orok ateak zabalik dituela azaldu zuten Mintzodromoan.

Aurten, asteazkenean egokitu da Euskararen eguna, eta zaldibitar askok ezin izan dute Mintzodromoan parte hartu, eguneroko eginbeharrak direla-eta. Dena dela, norberak bere etxean ere egin dezake euskararen egoeraren inguruko gogoetatxoa. Honakoak dira Mintzodromoan landu ziren gaiak, eta nahi izanez gero familian edo lagun artean ere landu daitezke. Ez dago gidoia zehatz-mehatz jarraitu beharrik, askotan gaiaren inguruan berriketan hasitakoan bide desberdina hartu dezakeelako elkarrizketak. Garrantzitsuena gogoeta egitea da.

1.    EUSKARAREN ORAINA

• Nola antzematen duzue euskararen egoera Zaldibian?
• Zer iruditzen zaizue deigarria?
• Lazkao Txiki: “Martxa honetan aurki erdaraz hitz egingo dugu euskaraz ari garelakoan”. Errealitatea bihurtu al da Lazkao Txikiren esana?

2.    EUSKARAREN IRAGANA

• Euskaraz hobeto hitz egiten al zen lehen?
• Eskolan gaztelaniaz ikasten zen, baina modu informalean euskaraz idazten al zen? (ohartxoak, gutunak, bertsoak)
• Zaldibia herri txikia eta oso euskalduna izan da beti. Gaur egun euskaldunak izateaz harro gaude. Lehen ere horrela al zen?

3.   EUSKARAREN ETORKIZUNA

• Hemendik 20 urtera Zaldibia euskararen arnasgunea izango al da?
• Non jarri behar da fokua etorkizunean ere Zaldibia euskalduna izan dadin?
• Zein izango da euskararen egoera Euskal Herrian 20 urte barru?