2024rako udal aurrekontua eta asmo nagusiak

Abenduko Osoko Bilkuran behin-behineko onarpena eman zitzaien 2024rako udal aurrekontuei, EH Bilduren aldeko bozkekin eta EAJ-PNVren aurkakoekin. Guztira 2.366.081,83€ko aurrekontua da. Urtarrilaren 23an, asteartea, azalpen saio irekia egingo da 18:30ean Herri Aretoan. Jarraian xehetasunak.

2023ko abenduaren 28ko osoko bilkuran behin-behineko onarpena eman zitzaion 2024ko aurrekontu proposamenari. EH Bilduko ordezkarien aldeko bozkak jaso zituen proposamenak eta EAJ-PNVko ordezkarien aurkakoak. Jendaurreko epea ireki da gaur iragarkia GAOn argitaratuta, behin betiko onartuta geratu aurretik.

AURREKONTUA ETA AURTENGO ERRONKAK

Udal antolakuntza berriaren arabera, honakoak dira aurrekontuaren eta 2024rako egitasmoen xehetasun batzuk:

AZALPEN SAIO IREKIA:

EGUNA: urtarrilak 23, asteartea

ORDUA: 18:30ean

LEKUA: Udaletxeko Herri Aretoan

HERRI BIZIGARRIA 

Bizitzea merezi duten bizitzak, herria eta burujabetza ditugu helburu. Egunerokoan eragiten diguten gaien eraldaketan sakonduz, honakoak aurten garatuko diren proiektu batzuk:

• Herriko Plaza: eraldaketaren lehen fasea gauzatzea, auzolana oinarri (18.000€ + iaztik gordetako 23.000€).
• Mugikortasun Plana aurkeztu eta aldaketak gauzatzen hastea (30.000€)
• Goizane Eraikina: Kixkurguneren irekiera eta instalazio fotovoltaikoa teilatuan (58.000€)
• Landa Lurren Digitalizazioa eta Bertako Basoaren sustapena (17.000€)
• Ekonomia Zirkularrean sakonduz: berrerabilpena, konposta, hondakinen birziklatzea-bilketa-tratamendua (194.547,16€)
• Bideetan, ur-sarean eta eraginkortasun energetikoan hobekuntzak (67.000€)

HERRIGINTZAREN KULTURA

Herritik eta herriarentzat, herri-mugimendua indartu eta herrigintza grina piztu, berreskuratu eta elikatzea da eremu honen xedea. Hemen urte honek dakartzan egitasmoak:

• Luberriko Kirol Aretoa egokitzea, ariketa fisikorako makineriaz hornituz (62.000€)
• Kultur eta Kirol taldeei diru-laguntzak eta baliabideak bideratzea (36.450€)
• Gaztetxoen Kabi berritua abiatzea (20.000€)
• Zaldibiako Ondare Immaterialaren inbentarioa egitea (30.000€)
• Jaiak, Kultur eta Kirol Ekintzak, Musika Eskola zerbitzua (141.500€)
• Euskara ikasketak, tokiko euskarazko hedabideak, UEMA eta laguntzak (25.110€)

KOMUNITATEA ETA ZAINTZA

Herritarra oinarri izanik, elkarren arteko harreman parekide, anitz, hezitzaile eta osasuntsuak sustatzea du helburu lan-eremu honek. Herri bizigarriko eta Herrigintzaren Kulturako egitasmoek ardatz izango dute beti komunitatea indartu eta harremantzea. Horretaz gain, eremu honi zuzenean dagozkien hainbat egitasmo ere aurreikusi dira, 2024rako:

• Berdintasuna sustatzeko ekintzak gauzatzea eta zaintza ereduan sakontzea (20.000€)
• Gizarte Ongizateko ekintzak burutu eta Elkarteei laguntzak bideratzea (16.925€)
• Babesgabetasun egoerei erantzuna ematea (34.000€)
• Aniztasuna lantzea (9.900€)
• Gizarte Zerbitzuen mapa garatzea (20.000€)

DIRU SARRERAK

Hauek dira aurtengorako aurreikusi diren diru-sarrera nabarmenenak:

Ohikoak:

• Udal Foru Funtsa, 1.459.105€
• Hiri Ondasun Higiezinen gaineko zerga, 167.000€
• Trakzio mekanikodun ibilgailuen gaineko zerga, 137.000€
• Hondakinen bilketa eta tratamendu zerbitzuagatiko tasa, 125.000€

Ez ohikoak edo bereziak:

• Landa Herriak diru-laguntza (GFA), Luberri aretoa egokitzeko, 37.042,73€
• Kirol ekipamenduak diru-laguntza (GFA), Luberri aretoa egokitzeko, 20.343€
• Erein diru-laguntza (EJ), Goizaneko instalazio fotovoltaikoa egiteko, 30.000€
• Ondare Saileko (EJ) diru-laguntza, Zaldibiako Ondare immaterialaren inbentarioa egiteko, 20.000€
• Landa Lurren digitalizaziorako (GFA), 7.000€

UDAL LANGILEGOA

Azken urteetan bezala eta kontratazio zuzena ardatz izanik, aurrekontuaren ia %40 udal langilego gastuetara bideratuko da. Nabarmentzekoak dira aurten arkitektoa udal lanpostu izatea onartu dela, urtarrilean behin-behinean betetzea espero delarik (%60ko lanaldian) eta Gizarte Zerbitzuen barruan, Etxez Etxeko zerbitzuaren indartzea. Kultur eta Kirol dinamizatzailearen eta Peoi Balioanitzaren jubilazioa tarteko, lanpostu hauek ere behin-behinean beteko dira.  

GOGORATU: HERRIA SARETZEKO, EMAN IZENA 

LOTURA HONETAN izena eman dezakezu. Zaldibia herri bizigarria izan dadin nahi dugu, herrigintzaren kultura oinarri duena eta elkar zaintzen duten pertsonek osatutako komunitate sena duena. Badakigu herritar askok bat egiten dugula erronka honetan. Elkarlana denez hori lortzeko bide bakarra, eremu bakoitzean lan egin, iritzia eman eta bere ekarpena egiteko prest dauden eragile eta herritarrak saretu nahi ditugu. 

Egin zure aukeraketa eta eman izena Udaletxean, Kultur Etxean edo aurrean ageri den loturan sartuz. Horrela, eremu horri dagozkion informazio eta deialdiak jasoko dituzu eta sareak lotzeko aukera izango dugu.