Ayuntamiento de Zaldibia

Zaldibitar hori

Herriko arau subsidiarioak edo Hiri Antolamendurako Plan Orokorra (HAPO) berritzen ari garen honetan, Hirigintza lan taldeak zaldibitarron iritzia ezinbestekoa du; herriaren nahia Hiri Antolamenduaren Plan Orokorraren (HAPO) oinarri izan dadin.

Zaldibitar, zure iritzia emateko unea iritsi da, beraz, hor doakizu galdera sorta hau. Bete aurretik zer pentsatua ematen duten datu batzuk eman nahi genituzke hausnarketarako balioko dutelakoan:

• Azken 40 urte hauetan, Zaldibiako biztanle kopurua beherantz doa. 1970.urtean 1988 biztanle izatera iritsi ginen, gaur egun, aldiz, 1500 inguruan gaude.

• 1970. urtetik gaur arte etxebizitza berrien kopurua izugarri handitu da. Honekin argi geratzen da, etxe gehiago izateak ez dakarrela berekin biztanleriaren hazkundea.

• 2001.urtean Zaldibian 665 etxebizitzetatik 108 hutsik zeuden, denak ez ziren bizitzeko moduan egongo baina, ez al dira etxe huts gehiegi?

• Etxebizitza berrietatik, zenbat daude hutsik?

• Kanpotik lotara etorriko den jende gehiago ekarriz Zaldibia handi bat nahi al duzu? Pentsatu ………..nolako herria nahi duzu?

• Nekazaritzako lurrak zertarako ? txaletak egiteko? Txabolak egiteko? Edo nekazariak kudeatu eta ustiatu ahal izateko?

Inkesta hau betetzerakoan hausnartu beharreko puntu garrantzitsu hauek mahai gainean geratzen dira.

Zaldibiako Udaleko Hirigintza lan taldea osatzen dugun herritarrok zuren erantzunaren zain geratzen gara, denok nahi dugun Zaldibia, Hiri Antolamendurako Plan Orokorrean txertatua geratu dadin.

Gogoratu zure iritzia kontutan hartzeko, inkesta hau uztailaren 15a baino lehen udaletxean edo Correos-ek herrian dituen postontzietan sartu behar duzula.